同一般AI唔同嘅係，ChatGPT充分展現出具人性化嘅對答以及表達嘅多元性，甚至連文章寫作、詩詞歌賦、代碼編程等都無一不精，令AI呢個詞再次成為年度關鍵字。

就咁睇，ChatGPT同本港學生一樣，都精通兩文三語，能言善道，各範疇均可以對答如流。既然ChatGPT咁犀利，唔知佢嘅廣東話水平又點呢？我同助教Michael（註）一齊考考佢。

由淺入深，我哋先問AI「十句廣東話的常用語」。

AI好快就答到「唔好意思」、「唔得」等嘅常用語。有趣嘅係，AI分別提出咗「唔該」同「唔該晒」，並且強調後者「唔該晒」係非常感謝嘅意思。由此可見，AI對於「晒」呢個廣東話程度補語嘅理解都算係幾細膩，亦識得當中嘅程度之分。

之後我哋叫AI以「嬲」字作句，其中一句係咁樣：「佢咁嬲嘅原因係因為遲到咗。」呢句喺語法上其實冇好致命嘅問題，但就勾起我哋對「遲到咗」同「遲咗到」嘅興趣。

我哋追問：廣東話「遲到咗」同「遲咗到」有咩分別？AI嘅答案係：（見圖）

AI話「遲到咗」比較常規，助教Michael並唔認同。事實上，兩者適用喺唔同語境，「遲咗到」通常用嚟表示對方已經完成咗呢個行動，重點在於行動本身，有啲似英文嘅過去式，例如「食咗飯」、「著咗衫」。至於「遲到咗」就唔同啦，因為「咗」字如果放喺動詞後面，通常係有更多資料嘅延伸，例如「遲到咗十分鐘」、「做咗十年老師」。因此，AI單獨使用「遲到咗」先係比較少見嘅用法。

日常用語還好，AI嘅內容甚至可以俾外國遊客做一○一入門課程，但去到一啲複雜嘅內容，例如廣東話諺語、歇後語等，AI就開始搞唔掂。例如我哋問AI「秘撈」、「炒魷魚」、「死雞撐飯蓋」分別係咩意思，AI只答啱「炒魷魚」，其餘嘅AI都只係從字面意思亂解一通。即使係咁，AI解說時其實係講得一本正經，頭頭是道，不諳粵語嘅人或者真係會信以為真。幽默啲睇，可能AI自己親身示範咩係「死雞撐飯蓋」呢！

筆者之後再考佢粵語造句嘅能力，其中一句咁嘅：「這家餐廳菜品雖然很好吃，但老闆卻用了很多不道德的手段在經營，真是秘撈得太過分了，如果被人揭發，恐怕就要被炒魷魚了。」顯然，當中AI亦將「秘撈」過分解讀成負面且不正當嘅行為，而「炒魷魚」嘅用法都好古怪。

簡單總結一下，就以上嘅簡單測試，目前ChatGPT嘅廣東話能力應該能夠應付粵語城市中大部分嘅日常溝通，但再深入啲佢哋就已經吃不消了。不過廣東話身為人所共知嘅最難語言之一，筆者對ChatGPT嘅表現其實已經相當滿意，而且人工智能嘅厲害之處永遠唔係其現有嘅能力，而係其高度嘅學習能力。話唔定唔使幾年時間，ChatGPT已經可以炒我哋魷魚。

註：莫逸濤（Michael）畢業於香港中文大學經濟系，現為Ben Sir's Academy助教。

（作者為藝人、香港中文大學中國語言及文學系前高級講師。）