Threads每段訊息唔會好似Facebook咁叫「貼文」，而係叫「串文」，就好似用線（threads）將訊息一個一個串起，形成「串文」。Threads嘅中文名譯做「脆」，而使用Threads嘅人就叫「脆友」。我都用過呢個「脆」字玩食字，大家睇吓下面幾個「脆」字真正代表邊啲字？

「被重『脆』出擊，條片下架，好沒『脆』，而家再上載，改過啲文字，可算係知情識『脆』，目的都係為咗你哋一班『脆』友。」

既然Threads係以內容及文字為主，想多啲讚好同回應，內文點樣鋪排係好講究嘅。近期精神健康係熱門話題，有次我想問吓鎅手嘅嘢，咁樣寫：

「鎅手好似女仔多，男仔會唔會架？」

我發覺冇乜反應，於是就將個「會」字改做「興」，除咗煽情啲之外，其實就係將鎅手呢個行動，講到好似係個潮流，睇吓激唔激發到年輕網民嘅反應。

「咩叫興唔興？呢個講法好似唔係咁啱用喺鎅手度……你講到鎅手好似係特登引人注目，見多人做所以做埋一份咁……咩料？少嬲。」

「用興呢個字唔係咁好……有啲嘢唔係我哋控制到。」

從呢啲反應嚟睇，我認識到鎅手背後有複雜且非單一嘅原因，我將呢啲對話同資深社工分享，佢話有個女仔，中二三，用鎅手嚟報復，血淋淋嚇佢唔鍾意嘅英文老師。

我差唔多每日都跑步，跑完步影張相貼喺Facebook鼓勵吓大家做運動，網民有反應；但貼喺Threads，冇反應；於是改變策略，將跑步嘅痛同鎅手嘅痛嚟做個比較，表面想賺取讚好，其實想為鎅手提供多一個選擇，例如：

「跑步會跑到抽筋；再加埋落雨，成個feel應該chill過鎅手，同意嗎？」

除咗跑步，我都有做引體上升，我又試過將鎅手嘅痛連繫到因引體上升而做到手痛，例如：

「喺Threads睇到好多人分享鎅手嘅經驗，目的大體上係以痛治痛，以鎅手嘅痛掩蓋其他嘅痛。介紹番吖，做pull up都好痛架噃，尤其是最後第九下，痛嘅範圍肯定大過你鎅手。唔信試下？」 

「運動，比起鎅手，自殘，甚至自殺好玩得多。引體上升，今日做得八下，輸咗畀琴日嘅我，聽日可能會贏番，做到九下。」

將運動連繫到年輕人自殘、自傷嘅行動上，用嘅方法都係小學中文堂時學過嘅比喻法，以痛將鎅手比喻成運動嘅痛，以痛將唔同可能連繫起來，等年輕人停一停，諗一諗，同揀一揀。

（作者為藝人、香港中文大學中國語言及文學系前高級講師。）