收工，大體上從員工角度出發，員工主動收埋工作，同類詞語有：收爐、收檔、收舖。放工，大概係從老闆角度出發，老闆放員工走，員工先可以收工；老闆主動，員工被動，例如：導演話可以放飯，主動權喺導演手上，演員係被動。

類似收工、放工組合，仲有：收手、放手，兩者都係解停止某個動作，例如：

你收手啦，唔好繼續加害小明。

你放手啦，唔好繼續控制小明。

當你解釋得幾好嘅時候，就嚟一個反例：收監、放監，意思係相反，一個收，一個放。正正語言有咁多反例、特例，語言學家先至有工開。開工相對於收工，而返工相對於放工。

另一對相反詞係：上、落；但上船、落船同樣可以解做離開船艙，拆開嚟解就係：

上船—離開船艙登上碼頭。

落船—從船艙落下然後登上碼頭。

有趣嘅係，上船、落船亦可以指進入船艙，即：

上船—離開碼頭踏進船艙。

落船—離開碼頭踏落甲板度。

呢度嘅上同落，好視乎船仔定郵輪，船仔嘅船艙往往低過碼頭嘅地下；但郵輪嘅船艙又高過碼頭嘅地下。簡單嚟講，要睇當時嘅環境而定。

但一講到搭飛機，上機、落機毫無歧義，上機踏進機艙，落機離開機艙，原因係無論大細飛機，機身一定係高過停機坪嘅地下。

繼續上、落。瞓上床、瞓落床同義，解做瞓喺張床度。 

另一對相反詞係：出、入。

但去到比賽時，例如足球比賽，出場、入場有時變得同義，即上場作賽，例如：

等咗咁耐，教練終於畀小明入場踢波。

等咗咁耐，教練終於畀小明出場踢波。

當然，出場係歧義嘅，亦可以解做離場，例如：

小明犯規領紅牌，被裁判趕出場。

另外，勝敗乃兵家常事，勝同敗係相反詞。但大勝等同大敗，例：

曼聯大勝利物浦（即曼聯勝）

曼聯大敗利物浦（即曼聯勝）

贏、敗相反，但打贏、打敗同義，例：

曼聯打贏利物浦（即曼聯贏） 

曼聯打敗利物浦（即曼聯贏）

不過，加個仗字之後，打勝仗、打敗仗維持相反，例如：

曼聯打勝仗（即曼聯勝）

曼聯打敗仗（即曼聯敗）

可愛嘅網民仲有下面嘅例子：

救、滅相反，但救火、滅火都係將火熄滅，同義。

生、亡相反，但逃生、逃亡係同義。

生、死相反，但生前、死前係同義。

陰功、冇陰功，明明加咗否定詞「冇」，但都表示慘情。

伸直、摺埋，明明相反，但都係解死咗。

嚟到成篇文章嘅高潮，我直接引用網民嘅說話：

「點解陰同陽係相反，但陰莖同陽具係同一樣嘢？」

（作者為藝人、香港中文大學中國語言及文學系前高級講師。）