於是，我翻查拙作《撐廣東話》（明窗出版社，二○一二年），裏面有一章講潮語，例子有：中同、摺拉、傾pro、黑面等等，真係冇一個係講移民，苦惱之際，再睇下各類型潮語嘅結合方式，得咗，雖然冇個別潮語講移民，但用潮語嘅結合方式講移民都得啫，諗到呢刻有啲興奮，有點曙光。

下面係被選用嘅段落：

移民嘅中英夾雜

古語有云：秋來也秋去，潮漲也潮退，移民定移居，點講都過得去。

你心儀嘅地方，你會移過去，務求心曠神怡；語言亦都會乾坤大挪移。Taxi移入中文變的士，bus移入中文變巴士，呢啲事小，阿婆都識，但以下嗰啲莫講話阿婆，就連阿嬋都唔識。升呢個呢字，識唔識吖？呢呢呢，唔識aa6 le5，呢個呢係level第一個音節/le/，如果解到咁都唔識，就真係要摺拉讀吓書。拉，嚟自library第一個音節。升呢、摺拉，表面好似兩個中文字，原來其中一個嘅真身係嚟自英文，仲係得半個英文字，就好似黃皮膚但就係英國人；白皮膚竟然係香港人，唔明個中道理？咁我哋真係唔啱chan，即係唔啱channel呀。

移民嘅中間插入

移民人士喺人生中途插入其他地方，其他地方嘅文化各樣嘢同時又插入難民，吖，唔係，係插入移民人士嘅人生，真係中伏，插晒入去就中晒伏。呢啲文化衝突，你適應唔到，一開始就會黑面，最後就係黑晒面。如果移民生活搞唔掂，要返番去原產地，畀朋友知道畀人串吓，你即刻西口西面，去到極致就係西晒口西晒面。當然，頭先嗰啲係移民失敗嘅例子，移民成功就要融入晒人哋嘅文化，硬插硬入都要，要努力進修，成日摺晒拉，讀晒書，將自己升晒呢，咁樣先同當地人啱晒chan。

移民嘅老人除

移民嘅人，不論男女老幼，都會將離開之地嘅語言文化、生活習慣、思想行為帶去新國度，呢抽嘢就會被鎖定、凝固、結紮成一個時間錦囊，時間耐咗就有一股老人味，一陣老人除。好似麥當勞，一入到去就有陣麥當勞味，好似係炸薯條加埋漢堡包嗰陣味，呢陣除初初叫麥記，之後陣味越嚟越濃烈，於是就叫老麥。去廉政公署多數有咖啡飲，成個公署都有一陣咖啡除，由廉記叫叫吓叫咗做老廉，紀念當中嘅咖啡跡。

我有睇個show，原來兩位表演者將上面幾段作為rap嘅內容，再創作下面幾句副歌，歌名叫《Let's go潮》：

Let's go潮，你話無聊？

If its all too new，maybe you're老油條

Let's go潮，識少少扮代表

唔識hey no big deal，早知你係咩料

Let's go潮，識少少扮代表

唔識hey no big deal，早知你係咩料

(作者為藝人、香港中文大學中國語言及文學系前高級講師。）