呢啲粵語短片可以提供大數據幫助我哋做口語訓練。我有幸今年獲邀請做香港區域TED Talk其中一個講者（註），單以我嘅表現為演講訂立標準，未免過於主觀，但如果同上千條粵語短片比較，便可以有一個較為客觀嘅圖譜。

步驟一：點樣做開場白？

我嘅講題係「跳出『單一思維神經線』，開創多元出路」。我以舊生嘅故事開始，指出佢唔敢面對自己做酒樓侍應，帶出做藍領低人一等嘅社會風氣。另一講者係章濤，佢係數碼金融專家，講題係「Web 3是一場價值覺醒，並不是貨幣炒賣」，佢以日常生活中朋友問佢比特幣幾時回升為引子。另一位係張婷茵（Bonnie），社工，佢講「劏房戶之所以住劏房，並唔係因為佢哋『懶』！」，開始時佢問觀眾邊個喺中西區返工。

三個粵語演講者就有三個開場白方式：以人哋嘅故事、以朋友嘅提問、以即場諮詢觀眾。呢啲實實在在嘅例子，唔係嚟自參考書，而係嚟自同一個場合，可比性相當高。用同樣嘅方法嚟比較、統計其餘嘅粵語演講片，就會總結出一個演講開場白嘅圖譜，畀大家選擇適合自己嘅演繹方式。

步驟二：點樣謀篇布局？

一篇好嘅演講，除咗有突出嘅開場白，謀篇布局尤其重要，即係要「有point」，當中涉及例子同組織，以下係我內文嘅組織情況：

跳出「單一思維神經線」以三個毫不相干嘅例子帶出：

例一：舊生以做藍領侍應為恥； 

例二：副學位副學士預設要刪掉「副」字；

例三：小學生默書一筆一劃嘅重要。

以單一思維及多元思維反映我成長三件事：

例一：同香港城市當代舞蹈團合作嘅舞蹈演出；

例二：報考博士時冇接受大學嘅錄取邀請；

例三：以A-Level成績投考大學失敗。

步驟三：點樣Call for action？

TED Talk有個規定就係演講最後要向觀眾call for action，即係希望觀眾有所行動，當日我嘅call for action就係叫觀眾思考：讀書方面，大學畢業後係咪隨即報讀研究院？副學位畢業後係咪立即接駁學位課程？讀完中三可唔可以先放假三個月，之後先繼續高中學業？最後我便以地道粵語短語嚟總結成篇演講：「單一思維即係睇唔開，多元思維即係睇得開。」

TED Talk大數據除咗提供好多正能量嘅演講主題外，仲係一個口才訓練嘅寶庫，正當粵語喺香港中學文憑試冇地位嘅情況下，學生點樣自我訓練口才，滿足大專學業同社會職場面試嘅需要，TED Talk過千條嘅粵語演講短片實在為我哋提供大量自學材料之同時，亦為粵語喺國際上插下鮮明嘅旗幟。

註：TED Talk頻道：https://www.youtube.com/watch?v=eL6UsW9CSyk&list=PLsRNoUx8w3rPyzACJJUxN4YRRpBgGf_jR&index=82

（作者為藝人、香港中文大學中國語言及文學系前高級講師。）