今次同我一齊講故事係十二歲鋼琴家李宇治小朋友，佢以小王子嘅身份述故事，我封咗個稱號畀佢，就係Ben Sir助手「小Ben Ben」，呢度將粵語疊字方式加喺英文度，好多小朋友都笑咗出嚟。

講故仔同演奏樂曲，梅花間竹，一講一奏，所以我要喺台面出出入入，趁住出入嘅縫隙，我就設計咗一個小環節畀小Ben Ben發揮，叫「學是學非，明辨是非」，加深觀眾對相關語文知識嘅印象，環節包括以下幾點：

一、故事裏面講到王子睇見美麗嘅天鵝，就背起唐詩〈詠鵝〉，但背唔晒，就以一句押韻嘅句子表示：「鵝鵝鵝，曲項向天歌，跟住就唔記得咗」；到咗「學是學非，明辨是非」嘅時間，小Ben Ben就咁樣延伸落去，即：「頭先嗰首詩歌叫〈詠鵝〉，係唐朝詩人駱賓王所寫嘅，識背嘅我哋成首背一次吖：『鵝、鵝、鵝，曲項向天歌，白毛浮綠水，紅掌撥清波。』」

二、故事講到「王子靚仔過Ben Sir」，到咗「學是學非，明辨是非」嘅時間，小Ben Ben就咁樣延伸個比較句，即：「如果唔用個『過』字，可以點樣講相同嘅意思呢？大家諗下，冇錯嘞，係用個『比』字，即係『王子比Ben Sir靚仔』」。

三、故事講到公主跳崖死咗，「學是學非，明辨是非」嘅環節就連繫到「死」字嘅唔同講法，即：「死除咗用個『死』字之外，仲可以點講？走咗、去咗、釘蓋、瓜咗、逝世、仙遊、辭世等等。我有冇講錯呀？我驚講錯會畀Ben Sir捏死。」

另外，我亦利用打油詩，增加押韻同修辭文化嘅元素。例如：王子以打油詩向小王子介紹公主嘅美貌，即：「眼睛bling bling水汪汪、白滑皮膚識發光，我嘅迷人小心肝，見到佢真係happy過happy hong kong」，韻腳係-ong，仲加埋「開心香港」嘅本地文化概念。

侍女見到王子、公主復活時，興奮到吟詩作對：「王子公主都冇死到！佢地生勾勾企響度！」韻腳係-ou，運用「冇死到生勾勾」嘅正反對比修辭技巧。

講解故事除咗要令小朋友覺得搞笑，亦要滲透一啲高層次嘅幽默感嚟娛樂家長，畢竟出錢買飛都係爸媽。

例如：齊格夫王子同貓頭鷹巫師對壘陣，就使出「小夫飛刀」，呢點係回應七八十年代電視劇《小李飛刀》；飛刀絕招叫做「小夫我要進來了」，呢度參考咗《多啦A夢》小夫一角嘅行為。呢個點子，連我身後面嘅樂團樂師都笑咗出嚟。

另一個大人嘅幽默位就係王子咁樣安慰公主：「蘭妮公主，無論你嘅外形係天鵝、飛蛾定林鄭月娥，我都係咁愛你。」全場爆笑，真係有賴前特首嘅人氣。

總體嚟講，喺呢類闔家歡嘅親子表演裏面，好笑成份既要迎合小朋友嘅口味，亦要同時顧及家長嘅品味；一方面要突顯粵語嘅樂趣，亦要包含本地文化嘅元素。

（作者為藝人、香港中文大學中國語言及文學系前高級講師。）