事緣有一日瞓醒碌下手機，發現有個學者喺短片裏面咁講，大致係：「粵語而家討論只係停留喺民間習俗嘅層次，點樣提升粵語嘅應用價值，而令得粵語可以討論更高層次嘅事物，譬如：學術討論？」於是，我就聯絡佢，即日見面，交流大家對提升粵語嘅睇法，最後定咗一系列嘅粵語講座，打頭陣就係我哋主講嘅「粵難越愛」。

簡單嚟講，就係點樣用粵語講高級嘢？我哋覺得而家一講粵語就係粗口、鹹片名、潮語等，個感覺好似香港情懷嘅蛋撻、魚蛋嘅層次。粵語可唔可以講啲高級嘢、高層次嘢呢？

例如：早幾年港台有個節目叫《五夜講場》，邀請不同學科嘅學者用粵語做科普嘅工作，介紹唔同學科嘅熱門話題，雖然而家個節目取消咗，但學者其實可以利用網絡平台進行類似嘅討論，令到大眾聽粵語就能吸收大學層次嘅高級知識。講嘅講慣，聽嘅聽慣，咁就間接提升咗粵語嘅應用價值。

另外，疫情期間專家教授出嚟向傳媒解釋病毒嘅散播途徑，好記得袁國勇教授用純正廣東話，冇中英夾雜嘅情況下，解釋廁所同大廈通風嘅擾流同負壓效應，呢啲屬於物理學嘅專有名詞，潛移默化咁留喺市民嘅腦海。

喺學界層面可以搞多啲粵語辯論比賽，用粵語訓練思考辯駁，提升批判思維。根據我做評判嘅經驗，冠軍隊伍多數嚟自名校，大膽猜測名校生多數成績好，有較多空閒時間用嚟思考辯論比賽呢啲高級玩意。

講座當日都有幾個中學生出席，我邀請咗其中一個寫咗下面嘅感想畀我：「要去『活育』廣東話，將佢變成港人進行專業討論最常用語言有好多方法，坊間亦有唔同團體做緊。但係我會問，點解要咁做？魚蛋、蛋撻唔夠咩？我諗佢哋對本土文化嘅重要性點都比用廣東話討論康德嘅定然律令（categorical imperative）多啩？Ben Sir喺講座提過，保育、推廣廣東話，睇嘅唔係佢嘅文化或歷史意義，而係一份情感。我理性上可以理解到佢嘅出發點，但其實我對依份所謂嘅情感冇咩感受。我自中四開始就去咗外國讀書，冇咩機會用廣東話做一啲高階討論。所以，對於我哋依啲『半ABC』嘅香港人，要先去感受廣東話喺我哋生活之中嘅價值，先可以體會到當中嗰一份情感，再為活育廣東話出一份力，明白到『粵』難越愛箇中滋味。」（謝奕睿　IB中六畢業生 亞美尼亞迪利然世界聯合書院）

《學識》粵語講座系列下半年仲有五講，請繼續支持：一、凝望粵語：藏喺腦袋裏嘅語言知識；二、電影字幕翻譯：點解咁少廣東話？三、為粵語揼石仔：粵語詞典工具十年回顧；四、粵講粵夜：香港現當代文學嘅粵語書寫；五、粵語流行歌填詞。

（作者為藝人、香港中文大學中國語言及文學系前高級講師。）