第一份滿足感，字調與旋律嘅配合，因為太技術性，會留番喺下一期介紹。而家就由第二份滿足感開始，以許冠傑《梨渦淺笑》嘅第一句「梨渦淺笑」為例，即使我唔識音律，起碼都可以比較「梨渦淺笑」呢句如果將啲字調換成「淺笑梨渦」唱出嚟，就肯定感覺到歌詞嘅字調同旋律唔夾同有衝突。如果換成：「陽光普照」，我哋感覺到啱音，因為梨—陽係第四聲，渦—光第一聲，淺—普第二聲，笑—照第三聲。所以啱音意思係新歌詞嘅字調，同原歌詞嘅字調相同。

上面當練習做，會有一啲成功感，但如果改編嘅歌詞同社會話題扣埋一齊嚟創作，成功感又會大咗，例如：將「梨渦淺笑」改做「爺孫今晚」，如果你有留意新聞，有位名人為搞好香港夜市獻計，提議爺爺帶同孫女夜晚去蘭桂坊劈酒，喺呢個語境，呢個意義之下，理解「爺孫今晚」就順理成章，講到呢度真係想唱埋落去：

《爺孫爺媳之梨渦淺笑》

爺孫今晚，想找找節目，

日夜顛倒愛夜蒲，

蘭坊氣味，心嚮往，

共對飲，酒精令二人醉。

媽媽睇見，氣憤沖天，

家事不要外傳，爸爸還未瞓醒。

爺媳相見，雙方竟冇事，

若是家嫂要割蓆，

遺產最後一仙都冇，

怒已消，一家繼續傻笑。

作到去副歌段，「媽媽睇見」同「爸爸睇見」，喺音調上都得，但點解我揀媽媽，因為可以連繫到較早前嘅新聞，話說又有位名人，佢因家翁發生某啲事而要同家翁割蓆，而呢位名人可能工作忙碌，將「翁媳」寫做「爺媳」，於是我就揀咗「媽媽」套入歌詞，為第三段嘅「爺媳相見」而鋪路。

呢首二創，難處係點樣將兩件毫不相干嘅事件：爺孫劈酒，翁媳割蓆，擺埋一齊而又有故事性，就係爺孫畀媽媽發現，但媽媽唔敢出聲，因為驚冇得分身家，當中需要相當嘅想像力，講到底改歌詞係娛樂，而唔係新聞報道，唔需要句句都符合事實。

聰明嘅讀者，可能留意到「爺孫今晚」同「梨渦淺笑」，音律上唔係完全配合，爺孫—梨渦都係第四聲第一聲配合，明白；但今—淺，第一聲同第二聲唔配；晚—笑，第五聲同第三聲唔配，但唱起上嚟又啱音，點解呢？留待下期分解。

（作者為藝人、香港中文大學中國語言及文學系前高級講師。）