我記得同助教Harry（註）到學校做講座時一齊分享過粵語填詞嘅趣味，大家一言一語，引吓台下觀眾發笑，形式同效果跟粵語相聲有啲相似，於是就請咗Harry記錄吓當日嘅情境同佢對粵語相聲嘅睇法：

香港人對「相聲」一詞可能比較感到陌生，但係相信大家都有聽講過咩係棟篤笑。其實所謂相聲就係類似棟篤笑嘅表演，顧名思義係靠表情（相）同埋聲音（聲）去表達包含笑料嘅故事情節；不過更加多嘅係按照一早寫好嘅稿同其他設定去講，所以我通常會將相聲簡單歸納為比較少同觀眾即時互動，而且內容、停頓位、語氣等等都更加一板一眼嘅棟篤笑。

粵語相聲喺香港近幾年嘅狀況可以用「買少見少」嚟形容。隨住黃子華喺二○一八年宣布封咪，唔再喺香港搞棟篤笑之後，相聲文化就好似逐漸淡出普羅大眾嘅視線。有人不服，話內地有相關節目，外國嘅stand-up comedy依然好受歡迎，但請各位留意：上述均只係「相聲」，而唔係「粵語相聲」。

至於點解我要強調「粵語」呢個元素？諸君切勿誤會。我絕對唔係想表達粵語相聲就係最優勝，最高人一等，畢竟用唔同語言嚟演繹嘅段子（相聲作品中某一節嘅笑料內容，香港人多數理解為「gag」）都有各自嘅韻味同獨特之處；但係正正就係因為咁，我哋更加要將唔同語言嘅相聲都傳承下去。身為一個以粵語為母語嘅香港人，我深信粵語gag獨有嘅呈現，係其他語言都無可比擬的。

舉個例子，例如Ben Sir平時好鍾意講嘅：究竟「靜雞雞」同「靜靜雞」比較，邊個靜啲？「靜靜雞」有兩個「靜」字，係咪代表更加靜？其他語言係無「靜雞雞」同「靜靜雞」呢兩個詞彙。當然，反之亦然，有啲人哋語言獨有嘅詞彙、呈現，我哋粵語都未必做到。

對於推廣粵語相聲，我同Ben Sir一直都係不遺餘力。上年同Ben Sir去咗聖若瑟書院（二○二二年五月二十八日）同埋港大同學會書院（二○二二年六月十一日）度分享，內容主要探討粵語嘅奧妙，講下填詞，講下句式；我哋以粵語相聲嘅形式分享，一唱一和，台上嘉賓講得迷人，台下師生亦聽得入神。將一場有教育意義嘅演講分享，透過粵語相聲中嘅gag表達，同學邊笑邊學嘢，例子都特別易記入腦，試問除咗粵語相聲，仲有咩分享形式可以做到？我哋成日口口聲聲話要守護粵語，一於透過傳承粵語相聲，將粵語發揚光大，同時將相聲呢個文化流傳千古。

齋講推廣粵語，好難做；推廣粵語相聲文化，有得做！

註：關尚禮（Harry）為Ben Sir's Academy助教，就讀香港大學中文教育四年級。

（作者為藝人、香港中文大學中國語言及文學系前高級講師。）