（1）用粵語學習 ≠ 學習用粵語

（2）用粵語教學 = 教學用粵語

結果，嗰期冇人應徵。組（1）兩句意思唔同，但組（2）兩句只係換咗「教學」，點解意思會一樣？

會唔會構詞方法唔同而導致意思上嘅差異？

組（1）、組（2）裏面，學習、教學係並列詞組，即係學、習兩字都係動詞；教、學兩者都係動詞。兩個詞組都係並列式，但就引致兩組句子之間嘅差異。

我哋試吓動賓詞組（如：寫信、填詞），即前字動詞，後字名詞賓語，例如：

（3）用粵語寫信 = 寫信用粵語 

（4）用粵語填詞 = 填詞用粵語 

結果，每組左右句子意思一樣。所以，我哋可以排除動賓式，而集中處理並列詞組，點解有組（1）（2）嘅差別。

組（5）用並列詞組「思考」，左右句意思一樣，同之前嘅並列詞組「教學」一樣，見組（6）。

（5）用粵語思考 = 思考用粵語

（6）用粵語教學 = 教學用粵語

點解同係並列詞組，「學習」會令左右兩句意思唔同（見組（7））？只要我哋將左右兩句稍為延長，補充一下資料，就容易睇得出有咩唔同。

（7）用粵語學習 ≠ 學習用粵語

（8）用粵語學習物理 ≠ 學習使用粵語本身

延長後嘅組（8），左句意思係「用粵語呢個媒介去學習物理呢個目的」，而右句意思係「學習嘅目的就係使用粵語本身」，左右兩句嘅學習目的唔同，導致組（7）兩句意思唔同。

其實，組（7）兩句延長時，只要將兩句嘅目的搞到一樣，心裏面畀多少少念力，兩句意思就可以一樣，見組（9）：

（9）用粵語學習物理 = 學習使用粵語去學物理

兩句都係用粵語作為媒介，兩句嘅學習目的都係學物理。

咁點解我哋理解組（7）時，唔會畀多少少念力去令到左右兩句意思相同呢？因為「學習用粵語」呢個短句，「用粵語」成為「學習」嘅賓語，意思完整，所以好難再用念力逼使後面再跟住另一短句「去學物理」。

其實，利用句子延長嘅方法，可以測試「用粵語思考」同「思考用粵語」嘅意思相同與否，例如：

（10）用粵語思考物理≠思考使用粵語本身

（11）用粵語思考物理=思考使用粵語去學物理

組（10）左右兩句嘅目的唔一樣，組（11）兩句嘅目的一樣，結果就導致組（10）（11）左右兩句意思上嘅差異。

最後，測試「用粵語教學」同「教學用粵語」，例如：

（12）用粵語教物理 ≠教點樣用粵語本身

（13）用粵語教物理 = 教物理用粵語

組（12）左右兩句目的唔同，組（13）左右目的相同。

句子結構好多時都畀出兩個意思，邊個意思容易獲得要睇外在語境，某個語境較強，就會較易逼出某個意思出嚟。

（作者為藝人、香港中文大學中國語言及文學系前高級講師。）