首先，我從粵語相聲帶出文化融合，粵語係大灣區嘅共通語言，相聲係兩個人一唱一和帶出幽默搞笑嘅說話表演藝術，而大灣區嘅相聲文化就係用粵語嚟表演，當中嘅表表者當然係老前輩黃俊英先生，佢雖然喺舞台上退咗落嚟，但仍致力推廣相聲，推廣粵語。

相聲可以係一人，即棟篤笑；雙人相聲對香港人嚟講較為陌生，記憶中有上世紀七十年代電視綜藝節目《雙星報喜》，裏面有個環節叫「點到你唔服，點解我要服？」由許冠文、許冠傑用塑膠槌拍打檯面，一唱一和，一攻一守，互相辯駁，勝方用塑膠槌拍打負方嘅頭。

推廣相聲可凸顯大灣區不同粵方言嘅特點，以幽默融和唔同地區嘅生活文化。另外，相聲亦可填補表演藝術嘅空間，由個人相聲、獨腳戲、到雙人相聲同埋多人嘅舞台表演。教育文化方面，相聲對口語訓練好重要，包括內容同演繹，因為要引發觀眾大笑，所以表演者要喺語言裏面將啲創意逼出嚟，間接誘使同學對語言培養高強嘅敏感度。

除咗將粵語融入相聲文化外，仲要融入其他表演文化領域。以我為例，舊年年底，我同香港城市當代舞蹈團合作咗一個親子舞台劇，我負責文字故事，藝術總監負責編舞，總監覺得我嘅粵語段落有節奏，可以編排舞步，呢個做法好創新。例如下面係用粵語六個聲調創作句子，我一邊讀，舞蹈員一邊同我翩翩起舞：

腰手腳齊舞蹈，胸口震頭腦動，鬆頸膊常美麗，甩手骹爬上樹，身體壯難染病。

較早前，我亦有同香港青年交響樂團合作，我用粵語將傳統嘅童話故事，例如：《青蛙王子》，重新演繹，配以古典樂曲嘅演奏，又係另一個粵語同其他演藝文化領域嘅融合。

除咗文化領域可以融合，再大啲嘅格局就係融合本身可唔可以形成一種文化，進行跨領域、跨界別嘅合作，例如：我本身對中英對比好有興趣，十幾年前出版咗《中英大不同》（青桐社，二○一一至二○一二年，兩冊）；之後又出咗本叫《中文數學交叉點》（香港教育圖書公司，二○一四年），將中文、英文、數學相互間嘅特點同互動，用淺白嘅文字寫出嚟。

以上從粵語相聲到文化融合進而融合文化嘅歷程，好似預設咗個人層面都應該有某種程度嘅融合，先至談得上唔同地方嘅融合。從個人做起，至少喺文化、人文方面，當中涉及好多深層嘅心理狀態，包括：態度、意識形態，需要長時間嘅培養、習慣，先至撈得埋一齊。一個官員自身有文化融合經驗，一個官員自身冇文化融合經驗，邊個會較有優勢去領導團隊，回應大灣區融合嘅宏業？ 

（作者為藝人、香港中文大學中國語言及文學系前高級講師。）