語文．書話
最近開辦親子溝通講座，教家長點樣做家長。我嗰個年代，冇話咩溝通唔溝通，根本冇用「溝通」呢個詞語嚟形容父母同子女之間嘅關係。父母仔女只有一問一答，一句起兩句止，可能連有商有量都冇，但係咁又唔代表關係唔好。現今世代，要講溝通，要傾偈，咁就對語言嘅要求高咗。
錯喺邊？
要親子溝通得好，首先要認識語言嘅複雜性。
家長日之後，父母攞住成績表翻去氣沖沖同仔女講：「老師話你成日做錯功課。」未教訓仔女之前，家長有冇充分理解做錯功課到底錯喺邊度呢？如果係寫錯字、串錯字，咁就屬於知識上嘅背誦記憶範圍；如果係計錯數、科學原理解釋錯漏，咁就屬於知識上嘅理解範圍。背誦同理解係兩個截然不同嘅認知能力，家長明唔明白呢？如果兩者撈埋一齊鬧，模模糊糊，仔女對點樣認清自己嘅錯處亦模模糊糊。
邊個覺得好辛苦？
有個靚媽曾經咁同我講：「我見阿仔好多功課，又要練波，好辛苦……」我一句截住佢：「邊個覺得好辛苦？係阿媽你覺得阿仔辛苦，定阿仔親口講自己辛苦？」做家長好，做聆聽者好，要注意某啲感覺係自己親身感受、人哋親口講畀自己聽，抑或自己主觀覺得人哋有某種感受，呢三個係唔同意思。
加油呀
好多時我哋鼓勵人哋時會講「加油」，但係有冇諗過人哋情緒低落，甚至乎有情緒病時，聽見「加油」就更加受到傷害？我聽過一位醫科生分享，佢曾經有輕生念頭，佢咁講：「我都冇油，仲點樣加油？」從病患者嘅角度，你叫佢加油意味或甚至乎責怪，佢未盡全力去做事。
類似嘅鼓勵說話仲有：
「唔好畀咁大壓力自己」；
「可以諗吓啲開心嘢，唔好諗埋一邊」；
「你已經好過好多人，好多人仲慘過你呀」。
以上所謂鼓勵性嘅說話假設對方做得唔夠好、唔夠多、唔識諗。咁應該點講？鼓勵性說話唔係唔講，而係要多啲接納成份，假設仔女考試零分，父母可以試吓咁講：
「今次考試零分，你成日留喺屋企，好似好唔開心喎。」（接納對方感受）
「想唔想以後開心啲吖？」（以提問確認係咪想維持而家嘅感受）
「想開心啲，咁你有咩建議吖？」（以提問由佢主動提出改善心情嘅建議）
「你呢啲建議好好喎，我聽見都好開心，咁點樣實行呀？」（進一步問佢點樣將建議實行）
「不如我又幫吓你，考到呢幾個分數，就有呢幾份獎品，好唔好？」（開始同仔女訂立溫書同獎勵計劃，寫落嚟做份合約）
上面啲問題同鼓勵冇降低父母嘅地位同身份，將個反思機會畀翻仔女，等佢哋自行管理自己嘅情緒同溫習規劃，最後先至共同分析考試零分嘅原因。
語言有佢複雜嘅一面，其實就係反映我哋個腦諗緊乜，繼而透視出我哋嘅精神有幾健康。
（作者為藝人、香港中文大學中國語言及文學系前高級講師。）
