語文．書話
呢幾個月就住精神健康我籌辦過一系列嘅公開家長講座，有媽媽（例如：教老母做老母），有爸爸（例如：教老豆做老豆），有啲父母都有（例如：教家長做家長）；與此同時，亦有去學校分享親子溝通同精神健康嘅關係（例如：教父母做父母）。其實全部講座都係講精神健康，但係個題目就要有啲變化，「教乜乜做乜乜」係個公式，而乜乜就係變項，即：老母、老豆、家長、父母。咁點解要用老母、老豆？你諗吓就咁「教媽媽做媽媽」、「教爸爸做爸爸」，你話悶唔悶？傳媒會唔會報道？
咁多講座裏面，我個中心思想係「精神雪櫃」，成個概念以至點解要用「雪櫃」都係有個過程。
由舊年十月到今年一月，我接咗十幾廿個個案，多數喺社交媒體同家長傾，亦有六七個係高中生、大學生親身同我面對面傾。我傾嘅策略係睇吓個問題喺邊：家庭定學校？
因為呢兩個係學生嘅安全網，如果個問題喺學校度，譬如：俾同學欺凌，咁我就叫家長要用家庭啲開心嘢，將個細路從學校拉開，拉埋去家庭度，譬如：假期一家人去迪士尼樂園。另外，如果屋企有問題，譬如：父母成日嘈交，咁就要用學校嘅開心嘢，將個細路從家庭拉開，拉埋去學校度，譬如：自己鍾意玩嘅課外活動。
呢度我用個「拉」字，動作係拉開、拉埋，呢度假設學校同家庭嘅問題可能好複雜，未必一時三刻可以解決，所以，我哋就要避開個問題，將個細路從個問題拉開，拉埋去安全冇問題嘅地方。情況好似消防員救火，總有啲消防員將市民拉去安全嘅地方咁。
世事有時冇咁幸福，如果家庭同學校都出現問題，咁點呢？情況就好似雪櫃咁，最大嗰兩格冇嘢食時，就要搵吓其他儲存格有冇嘢食，前提係要一早放定啲食物做儲備。
呢度我用咗「雪櫃」做比喻，成個講法係「精神雪櫃」；我有諗過用「精神急救箱」，驟眼睇急救箱好似好過雪櫃，但我嘅考慮係邊個夠落地、邊個夠入屋。其實，急救箱只係教科書描繪急救箱掛喺牆上面，實際上好少屋企會咁做，急救用品我哋係有，但未必用個紅十字嘅急救箱裝住，所以「精神急救箱」唔夠入屋。相反，雪櫃就每個家庭都有，將精神同雪櫃合併又會產生新奇嘅效果。喺講座裏面，我叫觀眾將個精神雪櫃打印出嚟通屋貼，仲要貼張喺個真雪櫃上面，講到呢度啲觀眾就笑晒口，想忘記「精神雪櫃」都唔得。
有咗「精神雪櫃」呢個咁具體嘅比喻，用運動、藝術、演藝、其他興趣等填滿裏面嘅食物儲存格，令細路唔開心時有多啲渠道發洩同提高抗壓力，其實就係將廣東話嘅「唔好諗埋一邊，要睇開啲」具體化：好少食物會好易諗埋一邊，多啲儲備就可以睇開啲。
（作者為藝人、香港中文大學中國語言及文學系前高級講師。）
