精神食糧

雪櫃裏面有食物，精神雪櫃裏面就有「精神食糧」，呢個精神食糧又係另一個衍生出嚟嘅比喻，用嚟比喻運動、藝術、知識技能等。其實，精神食糧呢個比喻我哋一直都有，用嚟比喻睇書，例如：每日睇《聖經》係我嘅精神食糧，所以精神食糧可以好自然咁套入去精神雪櫃嘅論述。

晾住個肚，晾住個精神

雪櫃有個功能係儲存食物，而精神雪櫃亦都係愛嚟儲存精神食糧，令到我哋有壓力時幫我哋頂住先。所以真係肚餓時，就會喺雪櫃攞個蘋果食，晾住個肚先，紓緩肚餓嘅感覺，到夜晚先大吃一餐。同理，情緒有啲抑鬱時，去跑吓步，畫吓畫，跳吓舞，唱吓歌，將繃緊嘅情緒紓緩一吓，晾住個精神先。當然，嚴重嘅抑鬱梗係要睇醫生啦。

其實，晾嘅原本用法係晾衫，一件濕咗嘅衫放喺竹竿上面晾乾佢；另外，晾腳，即係行到好攰，將隻腳放喺凳上面休息。而家用精神雪櫃晾住個精神，意思係用唔同嘅食糧支撐同頂住自己個精神。

唔好諗咁多，唔好死牛一面頸

上期我哋用精神雪櫃將廣東話嘅鼓勵語句「唔好諗埋一邊」、「睇開啲」具體化，即係睇住個精神雪櫃嚟理解呢兩句。今期睇「唔好諗咁多」，如果個雪櫃只有運動冇其他嘢，你叫我「唔好諗咁多」，但我嘅食糧只係得咁多，諗嚟諗去都係得運動，根本冇辦法「唔好諗咁多」。如果我個雪櫃除咗運動，仲有藝術、演藝、知識技能，我就可以唔使淨係對住一樣嘢去諗晒啲時間，仲有其他嘢分散我啲時間，我就做到「唔好諗咁多」。呢句鼓勵說話假設：你花喺零星選擇上面嘅時間太多，應該分配時間喺其他選擇度。至於「唔好死牛一面頸」，如果精神雪櫃嘅食糧好少，咁只係見到死牛嘅一面頸咁少嘅空間；如果食糧多啲，就可以見到死牛多幾個面向，空間自然開闊。

點都好，運用精神雪櫃嚟理解「唔好死牛一面頸」、「唔好諗咁多」，既可以睇到精神雪櫃嘅畫面，亦聽到鼓勵嘅說話，容易明過淨係得鼓勵嘅聲音。

順帶一提，精神雪櫃可以解答一啲比較尷尬嘅問題，例如：父母嘅轉數冇仔女咁高，點算？因為父母嘅精神雪櫃嘅食糧冇仔女嘅食糧咁多，所以父母應該豐富翻自己嘅精神雪櫃。唔需要長篇大論去解釋，搞掂。

（作者為藝人、香港中文大學中國語言及文學系前高級講師。）