首歌原曲係《快樂頌》（貝多芬第九交響曲終樂章），希望以輕快嘅古典旋律填上全新歌詞帶出親子溝通同學童精神健康嘅重要，藉以打救每一位細路。咁點解係要一首歌？希望填補社會嘅空缺，我哋有反吸毒歌曲、有熱愛《基本法》嘅歌，點解冇一首歌關心親子溝通、學生精神壓力呢？當然希望同政府三層學童精神健康機制配合，因為機制好冰冷，所以我希望新詞好熱血，一冷一熱加埋就好溫暖。

《打救你》係我同學生陸秀霞（Sarah）一齊填詞，佢而家喺大學教緊教育心理學。歌詞如下：

                        （一）

淨係要追測考分數  有冇上心關顧我  

滑浪劍擊都要攞獎  排名證書逼爆我

你我擁抱並肩出發  迎着急風與波濤  

日日笑口走出苦惱  快快將心聲細訴

                        （二）

又係小息孤單一個  無人願意睬吓我  

樣貌髮式稍有偏差  人人哈哈取笑我

興趣不會只得一個  去chill 傾偈跳Yoga  

運動唱歌打下太極  困擾心境總會轉

                        （三）

夜夜眼光光到天光  床前明月失心慌  

日夜到黑輾轉反側  磨牙咬手手震震

變化不要驚慌失措  煩悶抑鬱要舒緩  

但願你將心裏困惑  與我一起釋放佢

                       （四）

日日唱好加油打氣  無能無力點樣加  

但係覺得總要死撐  似有把聲音叫我

聽聽心裏自己感覺  萬千苦惱與心煩  

慢慢去講心裏問題  撐你不只得我倆

總體嚟講，四段歌詞每段前後部分以一問一答嚟進行，體現學童與師長嘅溝通；每段歌詞一個場景，布局做到起承轉合。

全首以學校測驗考試課外活動嘅壓力打開序幕，第二段以學童人際關係中嘅冷漠與嘲笑嚟承接，緊接第三段午夜夢迴產生唔同嘅情緒病徵，最後一段諷刺社會口號式加油與打氣嘅無能與無用。

至於歌詞本身有咩特色？首歌用廣東話唱，當然就有廣東話詞語，例如：

淨係、有冇、攞獎、逼爆、又係、睬吓、傾偈、手震震、佢、點樣、但係、死撐。

另外，用咗一啲疊詞，例如：日日、快快、人人、哈哈、夜夜、眼光光、手震震、聽聽、慢慢，增加歌詞嘅韻律性。歌詞雖然有口語成份，但第三段第二句「床前明月失心慌」有用典故，用上李白〈靜夜思〉「床前明月光」，典雅與通俗兼備。

今時今日，要配合一個運動，例如：推廣精神健康，只係一首歌係唔夠，要更加具體同入屋，就要拍條片，個重擔就落咗喺陳恩碩（Tom）導演身上，我哋傾得好快，一個鐘開完會第二日就拍，我好好彩，有徐綽恩（Isabella）小妹妹幫手，希望大家多多支持（註）。

註：《打救你》短片：https://www.youtube.com/watch?v=6_d-nyIOGCw。

（作者為藝人、香港中文大學中國語言及文學系前高級講師。）