以下係Jason分享當日講座嘅點滴：

今年三月一號，我有幸參與歐陽偉豪博士舉辦嘅「教學生做學生」講座，同在場觀眾一齊探究中文同數學嘅異同，希望更多學生能夠跳出學科嘅規限，享受跨學科學習。所謂探究，就係尋根究底，思考一啲大家平時唔會諗嘅嘢。舉個例子，廣東話嘅「係」字有以下用法：

一、今日嘅講者係歐陽博士。（相等）

二、歐陽博士係香港人。（屬於）

例句一嘅「今日嘅講者」同「歐陽博士」指嘅係同一個人，而例句二嘅「歐陽博士」只係屬於「香港人」呢個群體，唔等於全部「香港人」。至於數學裏面，例句一嘅關係可以用等號（=）表示，例如「3+4=7」，所以「我有3+4個蘋果」即係「我有7個蘋果」。而例句一用等號表示就係「今日嘅講者 = 歐陽博士」。

至於例句二，所表達嘅關係叫「屬於」，即係歐陽博士屬於香港人，當中涉及到「集合」呢個概念，數學以屬於符號（∈）嚟表達。例如：「7∈整數」代表 7 係「整數」呢個集合裏面嘅一個元素，7屬於整數但係唔等如全部整數。

集合論係高中數學嘅課題，因此唔少人應該識得分辨「相等」同「屬於」兩種關係。不過，母語係廣東話嘅人即使無學過「係」嘅兩種用法，都一定唔會搞錯兩種意思。我哋借用數學概念，描述「係」嘅兩種用法，更顯示得出語文嘅複雜、微妙之處，亦都證明學術唔係乜嘢遙不可及嘅事，反而同語言，同生活息息相關。

香港嘅學術環境好特別，好多大學同中學都用英文教書。大部分學生討論學術內容嘅時候，都係用唔鹹唔淡嘅中文溝英文：「呢個data係anomaly，應該要omit。」要理解呢啲句子，喺接觸深層次概念之前，要先過咗英文詞彙呢一關。

用英文講學術，當然方便同世界接軌；但係用自己最熟悉嘅語言，學習同解釋新事物一定容易啲。要將艱深抽象嘅概念，化成淺白嘅廣東話同其他人分享，係學術能力同表達能力嘅挑戰。廣東話畀人嘅印象可能係「口語」或者「難登大雅之堂」，但係呢個講座就係一個難得嘅機會，證明廣東話都可以用嚟講學術。 

註：鄧曜弘（Jason），OIST沖繩科學技術大學院大學博士生，劍橋大學數學學士、碩士，聖保羅男女中學畢業。