上一期講「中文溝數學」，今期講「兩文三語」，我請咗兩位港大醫科生做嘉賓講者：Angel同Icy。醫學需要從零碎、看似無關嘅病徵，分析到背後嘅病因。同理，兩文三語表面係瑣碎嘅三言兩語，背後隱藏住咩語言規律？以下係一啲廣東話、普通話、英文互相比較嘅例子。

有次行街，前面有對母子，個仔三四歲，阿媽問佢食咩，佢話：「gau6 gi1」，我以為自己聽錯，跟住阿媽話好呀。我再諗多一陣，我都知道個仔食咩，係壽司！雖然阿仔將壽司（sau6 si1）讀錯，但呢個「錯」唔係隨意嘅錯，只係將/s/錯配為/g/，而其他部分：韻母、聲調都啱晒，所以阿媽認得，而我又估啱。

依照呢個「逢s必g」嘅規律，我哋可以預測阿仔會將「食壽司」讀成「gik6 gau6 gi1)，「姍姍食壽司」讀成 「gaan1 gaan4 gik6 gau6 gi1」。

簡單一句，雖然表面讀錯音，但錯得有道理，錯得有規律。

中英夾雜係香港嘅語言特色，當中有好多用法都好有趣，例如：一個for字就有以下四種用法：

「如果只係for佢嘅話」；

「部機可以for你玩到game」；

「for我嚟講，靚仔唔足以去形容我」；

「係for瞓覺著唔係for著出街」。

一for四用表面好似好懶，但其實轉翻合適嘅廣東話，要動用四組字，即：

「如果只係為佢嘅話」；

「部機可以畀你玩到game」；

「對我嚟講，靚仔唔足以去形容我」；

「係愛嚟瞓覺著唔係愛嚟著出街」。

所以絕不是懶嘅問題，你要認清楚呢四組廣東話嘅字，先可以用個for字嚟代替。

我哋成日話廣東話好有趣，其實要同其他語言相比，例如：普通話，先凸顯兩者嘅特色，就好似個「貪」字，一貪三用，如下：

「貪佢夠大」；

「我貪歐洲車安全過日本車」；

「我而家先至吸塵，就係貪佢做緊功課，唔使阻住晒」。

但翻譯成普通話，就要用三個唔同嘅字，例如：

「貪錢、貪便宜、貪玩」；

「圖歐洲車比日本車安全」；

「趁他做功課，才吸塵」。

第一種貪嘅用法，普通話、廣東話一樣。第二種，普通話用咗「貪圖」嘅「圖」，而廣東話就用「貪圖」嘅「貪」。第三種，普通話唔可以用「貪」，只可以用「趁」，但有趣嘅係廣東話都有「趁」嘅用法。

我哋將兩文三語比較，唔係想教同學學好語文咁簡單，呢啲由語文老師負責，我哋想貪多啲，就係比較唔同語言嘅形音義，搵到相同或類近嘅模式，再推敲上去到底語言喺人類個腦袋點樣運作嘅呢？呢種跨語言、跨學科嘅學習，學校因時間關係未能提供，咁唯有我哋做多啲。

（作者為藝人、香港中文大學中國語言及文學系前高級講師。）