第一次見Ben Sir嘅時候，佢問我：「點解music is a universal language ?當中有咩奧妙？」於是我哋花咗整整三個鐘拆解音樂各種結構，再嘗試同語文比較，一直討論到餐廳閂門先離開。

要搵出語言同音樂嘅共通點，首先要了解兩者嘅本質。兩者都有「聲音」，但唔係所有語言嘅音都有意思。廣東話屬聲調語言，同一個字，用唔同音讀出嚟，意思可以截然不同。咁點解我哋每個人聲帶唔同，說話有唔同嘅「音高」，但又明白大家所講嘅字？原來同音樂中「調子」（Key）嘅概念有關，就算我將兒歌" Mary Had a Little Lamb "用唔同調子彈奏出嚟，你依然能夠即刻聽得出係咩歌，即係聽得出個旋律。所以平時講嘢，大家音高唔同，調子唔同，但聲調一樣，都係「優柚幼油有又」呢個旋律，就足以令我哋明白對方嘅意思。

當晚提及到嘅「停頓」概念，係講座中一大精髓。大家學語文，學音樂多數只關心「有字」、「有音」嘅部分，而唔多留意「冇字」、「冇音」嘅部分。語文中嘅標點符號同音樂中嘅休止符同樣表示停頓，但喺精準度上就有啲唔同。日常對話中我哋唔會刻意計算停頓嘅時間，彈性非常大；但音樂嘅停頓經過精雕細琢嘅設計，而且可以用數學精準計算出嚟，例如：有長到四拍休止符，亦有短到八分一拍休止符。

語言嘅一問一答，例如：「你食咗飯？我食咗飯。」當中出現嘅語音停頓（假設冇文字嘅對照），係靠「尾音」體現出嚟。問句完結嘅「飯」尾音向上，表示疑問；答句完結嘅「飯」尾音向下，表示肯定。音樂中嘅「終止式」（Cadence）同語言問答呢對概念又有幾分相似。「不完全終止式」（Imperfect Cadence），例如和弦（chord）由低音去高音，就好似問號「？」畀觀眾「未完」嘅感覺；至於「完全終止式」（Perfect Cadence），例如和弦由高音去低音，就好似句號「。」畀觀眾有「完」嘅感覺，為樂曲畫上句號。一問一答嘅概念喺音樂中無處不在，演奏者可以自問自答，整個樂團可以互問互答，用音符、旋律展開一場對話。

講座中我同Ben Sir探究咗語言同音樂四大共通點：調子、問答、停頓、完結，但係我哋仲有好多未講，例如：拍子、一詞多義、押韻等等，期待第日可以有第二個講座，繼續Lingua-Mushake。

註：譚潔薇為香港大學音樂及社會科學雙主修三年級學生、港大學生發展及資源中心傑出表現得主、鋼琴演奏家。

（作者為藝人、香港中文大學中國語言及文學系前高級講師。）