親子溝通其中一個重要環節，就係媽咪詢問仔女喺學校發生咩事，例如：仔女放學翻屋企，媽咪見到本書爛咗。

好多時，媽咪劈頭第一句就問：點解本書爛咗？咁樣問法，好多時小朋友唔識答，又或者唔敢答，因為「點解」意味要解釋，點解要解釋？因為想追究責任，早已假設仔女做錯事。

所以，想問得比較好，就唔好用「點解」，而係問啲資料性嘅問題，例如：「本書畀邊個整爛？」

咁樣問係問人物，相對地比問點解易答，因為只係針對人物呢個單項資料。

但好多時一涉及人物，媽咪情緒就開始激動，好緊張，向仔女繼續追問，究竟係邊個小朋友整爛，之後就盤算即時打畀對方家長，定係第二日接送返學先至同對方家長講。

理性話畀我哋知，一件事情嘅發生唔會淨係同人物有關，好多環境證供都關事，但係扯晒火嘅媽咪又點先可以回復理性？咁就要理解事件嘅資料到底有邊幾項。

例如：我琴日同小明搭地鐵去旺角好興奮咁買咗五件好新潮嘅tee。

根據下表，我哋可以睇到唔同性質嘅資料分布。

媽咪最關心嘅資料就係「狀態」，因為佢包含較多嘅資料：

例如：發生時間（琴日）；方法（搭地鐵）；發生地點（旺角）；同行人物（小明）；感受程度（好興奮咁）。

如果將呢啲資料整理成下表，媽咪就可以打印出嚟，照住嚟問子女到底發生咩事，咁就可以客觀啲、理性啲，避免產生主觀嘅情緒而影響對事件嘅理解。

重看最初嘅例子：仔女放學翻屋企，媽咪見到本書爛咗。

媽咪可以利用上表嘅資料分布表格嚟問仔女，如下：

狀態資料    詢問字眼

人物         同邊個

時間         幾時、邊年、邊月、邊日

地點         喺邊度、去邊

方法         點樣做

感受程度     咩心情

以呢啲資料嚟問小朋友，全部都冇責備嘅成份，小朋友冇咁驚，就可以如實咁回答，親子間就可以保持對話，維持溝通，邊個整爛本書已經唔再重要。

（作者為藝人、香港中文大學中國語言及文學系前高級講師。）